الجزء الأول


السلام عليكم ورحمة الله وبركاته

/
\
/
\
/



في ليلة قمت من النوم مفزوع .. شفت حلم يخوف ورحت للوالدة وقلت لها عن الحلم .. طبعا جارتنا تفسر أحلام ومعروفة بالرياض وامي ماصدقت خبر قالت لها عن الحلم وفسرته .. وقالت لأمي .." ولدك راح يسافر .. والله يستر عليه من هالسفره " .. رجعت وقالت لي أمي تفسير الحلم وما اهتميت بصراحه لانها دايم تفسر أحلام واكثرها مايصيب .. المهم نسيت الموضوع في وقته ولا كأني سمعت شي .. بعد هالكلام بأربع شهور تقريبا في آخر صيف 1425 هـ وبعد ماصلخنا الحر في الرياض قررت أسافر لدولة باردة أغير فيها جو لمدة اسبوعين على الأقل .. طبعا ذاك الوقت كنت اشتغل في شركة ودوامي 8 ساعات يوميا وصار لي فترة طويلة على هالروتين الممل .. فكانت فكرة السفر فكرة مثالية بالنسبة لي .. المهم قدمت اجازة لمدة شهر.. وفعلا رحت للبيت واخذت يومين راحـة .. وخلال اليوميـن قعد افكر ويـن أروح ؟؟ وين أروح ؟؟ واتصلت على خوياي اللي يسافرون معي دايم وسألتهم وش رايكم انا عندي اجازة وودي أسافر من يروح معي ؟ طبعاا اثنين متفقين يروحون تركيا وواحد بيسافر مع أهله لعمان .. باقي واحد يقول ماعندي إجازة ولكن بحاول في العمل ان شاء الله يوافقون .. قلت رد علي انا مستعجل !! ؟؟
المهم اعتذر خويي بعد كم يوم وقعدت بلحالي … وفي رابع يوم اتصل علي واحد من خوياي في اليمن .. يماني واسمه عبدالله .. هذا الشخص تعرفت عليه عن طريق النت وقابلته في جدة أكثر من مره وحلف علي أزوره في اليمن واعطيته وعد اني أزوره .. لاني حبيت هالولد وشفت فيه مواصفات الرجولة في أكثر من موقف .. المهم اتصل علي وقعد يسولف معاي .. قلت له وانا أمزح .. يالله انا جاي اليمن بعد يومين !! ويصرخ ويقول مو معقول يالله تعال الجو الحين من ابدع مايمكن .. لايفوتك الجو صار لنا اسبوعين ماشفنا الشمس وامطار وخير .. بصراحه انا ناسي شكل المطر في الرياض يوم قال لي هالأخبار الحلوة تحمست .. قلت ياولد روح قص التذكرة وماجاك عندي. ؟



رحت لمكتب سياحي وسألته عن الرحلات قال لي الرحلات اسبوعية عندنا وعلى الخطوط اليمنية بس .. قلت طيب متى أقرب رحلة قال بعد 3 اسابيع !! لحووول خلصت الاجازة .. طيب والحل !! قال مافيه الا تروح عن طريق جدة .. يعني خط الرحلة بيكون .. الرياض – جدة – عدن .. والعودة عدن – صنعاء – جدة – الرياض !! قلت طيب كم التذكرة قال بـ 3150 ريال .. قلت وين !! والله لو اني رايح اليابان .. قال لي ومو أكيد الحجز يعني جدة عدن انتظار .. ورحلة العودة انتظار بعد .. ( ياساتر ) المهم قال لي ليش ماتروح بر ؟؟ قلت كيف .. قال فيه باصات تروح لليمن عن طريق البر .. بـ 200 ريال !! قلت في نفسي 200 ريال بس .. ماهيب شينه على الاقل نتمشى ونشوف كل شي على الطبيعة .. المهم رحت لمكتب الباصات وقابلت الموظف وسألته عن خط سير الباص .. قال لي الرحلة 35 ساعة يعني يوم ونص .. قلت مو مشكلة أهم شي مايكون الباص مزحوم ويكون مكيف .. قال لي أبد مافيه الا عشرين واحد معك والباص فيه 45 مقعد .. قلت حلو جدا .. بس بكرة الصباح تجي عندنا هنا قبل الساعه 7 قلت أوكي ..وقصيت التذكره ورحت للبيت ..





رجعت للبيت وقلت لأمي اني بسافر .. وجهزت أغراضي وكل شي أحتاجه وانا قاعد ارتب شنطتي جتني أمي وقالت انت خلاص عزمت تروح .. قلت ان شاء الله .. قالت لا لاتروح .. قلت ليـه .. قالت مادري ماني مرتاحه .. وجابت سيرة تفسير الحلم اللي حلمته .. ! قلت لهاا لاتشيلين هم هذي تفسر عشر احلام واحد صح وتسعه من جنبها .. وبعدين مو اول مره اسافر .. انتي بس ادعي لي وماراح يصير شي بإذن الله ..





المهم في اليوم الثاني صحيت بدري وأخذت شنطتي ومشيت للمكان اللي فيه الباص ، ولقيت ناس متجمعين يمكن أكثر من 40 نفر .. وعوائل واطفال طبعا كلهم يمنـه ( يمانيون للي يحبون الفصحى ) .. قلت لأقرب واحد كل هالشعب بيركب ذا الباص قال إيه .. قلت لاحووول !! هذولا مايكفيكم ست باصات !! والله واركب معهم في آخر مقعد ورى .. ويجي الشوفير ( السواق ) ياخذ جوازاتنا وتعال شوف كل الجوازات سود الا انا اللي جوازي أخضر .. ويمشي بين الركاب وكلهم يطالعون بهالجواز السعودي .. كأنهم يقولون وش جايب السعودي معنا .. وراكب باص بعد .. صدق ذا شكلة منتف ماقدر يروح بالطيارة !! خخخخخخخخخ المهم زادت الزحمة في الباص وفيه بعض الركاب مالقوا كراسي وصاروا واقفين .. واقوم من مكاني واروح للسواق قلت له اصبر شوي ابنزل للمكتب .. واروح للموظف اللي يشتغل فيه .. قلت ياخوي انت قايل لي أمس ان الركاب عشرين بس .. والحين مثل ماتشوف .. ناس ماهي لاقية مكان تقعد فيه ..!! شكلك تقصد عشرين ألف .. قال لي لا لا ماعليك فيه باص ثاني موجود في الخرج بياخذ نص اللي معكم .. قلت أكيد .. قال أكيد !! المهم رجعت للباص وقلت في نفسي الخرج ماهي بعيده كلها 80 كيلوا نتحمل وش نسوي .. المهم يوم جيت لمكاني لقيت شايب قاعد فيه .. خخخخخخخ لاحووول وش يبي ذااا ؟؟ قلت ولو .. كمل جميلك يابو عبط وخلك واقف الين توصل الخرج .. وبعدين ذا شايب مايصير يوقف وانت تقعد .. المهم تعلقت بواحد من المواصير كأني هندي نازل البطحا على باص ابوريالين .. وتمشي الأمور واقعد اسولف مع اللي جنبي اضيع وقت .. وشوي الا اخوانا في الله الواقفين اخذوا بطاطين وفرشوها في الممر اللي بين الكراسي وناموا .. وانا الوحيد اللي واقف .. من جد موقف ماله داعي .. بغيت امسك الشايب واشوته واقعد مكاني .. بس قلت برضه مايصير انت تقعد والشايب يوقف .. وتمر ساعة وانا على هالحال .. ساعتين .. وصلنا الخرج .. تعدينا الخرج متجهين لوادي الدواسر .. وكل شوي أتلفت يمين ويسار أدور الباص الثاني .. ماش الخط فاااضي والعالم نامواا قلت والله شكلها نصبة ومشت علي .. الحين ابي اروح للسواق أسالة بس كيف أروح والعالم نايمة في الممر .. والله النشبة !! المهم شفت محطة بعيدة قلت أكيد الباص الثاني ينتظرنا هناك أو على الأقل بيوقف السواق واقدر اتفاهم معه .. وصلنا المحطة .. تعداها ولاوقف .. اففف الى متى وانا واقف .. بصراحة مليت والمكيف مايبرد وزحمة وريحة تجيب الربو .. والتفت على الشايب والقاه في سابع نومة ويشخر .. وانا في نفسي امسكة واحذفة مع الشباك بس قلت ياولد وين الرحمة والرفق بالشيبان << على وزن الرفق بالحيوان .. هالشايب مافيه الأ أجر وهذا بحسبة جدي وانت يالعبيط .. اصبر .. ان الله مع الصابرين .. ؟؟
مرت ثلاث ساعات ماشين في الخط وتقريبا بقى على وادي الدواسر 40 كيلو .. ومافيه أي أثر للباص الثاني ، وما احد مات من الركاب عشان اقعد مكانه .. والحر بدى يزيد مع هالمكيف الصحراوي .. وانا واقف وحاط القميص على خشمي .. وحالتي حااااله .. المهم شوي الا السواق يوم فتح الدرج وطلع شريط .. وشغله !! ياااسلااام .. هذا اللي كان ناقص .. شريط اغاني يمنية .. الفنان فيصل علوي .. طربطييييييييط .. قلت لااا عاد زودتوهااا .. واقعد اتوطى في العالم اللي نايمة في الممر واحد اوطى رجلة والثاني على بطنه ومشي حالك الين وصلت للسواق ..

وش قلت للسواق .. ووش قال لي .. ؟؟؟

/
\
/
\
/
فقط : تابعونا في الجزء الثاني ؟؟ 

/
\
/
\
/

عودة مع الجزء الثاني من مذكرات عباطه في اليمن السعيد ..

اصبروا خلونا نشوف وين وصلنا عشان ما أنصب عليكم خخخخ ايه وصلت للسواق وانا معصب .. قلت له طف المسجل !! قال لي شو .. قلت شو في مافي .. طف المسجل وخل نتفاهم ..!! الحين انت ماتشوفني واقف ثلاث ساعات ورى والعالم متبطحة في الممرات ماهي لاقية مكان .. وانت ولاهمك كأنك شايل معك غنم مو أوادم ..!! وفوق هذا تشغل أغاني .. ومين؟؟ فيصل علوي !! .. قال لي انا شو دخلني قلت انت المسؤول ، ثانيا وين الباص اللي قلتوا انه بيشيل نص الركاب .. تلعبون علينااا .. قال لي اسمع أخي مافيه باص ثاني بدك هيك والا انزل .. قلت لا والله هــــزلت .. شف يابو الزلم والله لأبلغ عليك أمن الطرق .. يوم انخرش شوي قال لي انت سعودي .. قلت لا انا مصري وامي كندية .. اعلمك الحين ونشوف من اللي ينزل انا والا انت ..!! والله من الهياط عندي وافتح الجوال ابتصل على أمن الطرق .. ويطلع مافيه شبكة .. افااا .. واشمط العافيه وارجع مكاني .. وامسك ماصورتي !! ؟؟

مرت عشر دقايق وبديت اتضايق من جد وكرهت أم الروحة لو إني قاعد في حر الرياض اصرف لي .. على الأقل اللي معاي رايحين لأهلهم وعيالهم أما انا وش مكلفني ازيد الهم هم واركب باص واسافر واقـــف .. ؟؟

رجعت للسواق وقلت له وقف عند أقرب محطة لو سمحت قال لي ليه قلت بشرب بنزين ... ليه يعني ؟؟ وش ضنك ابوقف الين نوصل اليمن .. ياخوي ترا انا انسان مانيب خشبة .. خلني ارجع للرياض اتفاهم مع مكتبكم .. المهم وصلت لمحطة ووقف عندها ونزلت شنطتي وقلت حسبي الله عليكم ... ؟؟؟

والله واروح للبقالة واشرب لي شي بارد واقعد اسولف مع الهندي شوي وسألته كم باقي على وادي الدواسر قال 10 كيلو .. طيب الرياض كم كيلوا من هنا قال 400 كليو .. طلعت من البقالة ما أدري وين أروح .. اكمل لوادي الدواسر واركب تاكسي للرياض والا اقعد على الخط وآشر للي رايحين الرياض .. المهم رحت وقفت بالشمس والساعة الحين تقريبا 2 الظهر وفي عز الحر والقيظ وهواء حار يشوي الوجة .. واقعد احتري أي سيارة تمر من عندي وبعد ربع ساعة مرت شاحنة واشرت لها وماوقفت .. وانتظر شوي ويمر من عندي أكثر من سيارة وماش ماحد يوقف مدري هم خايفين والا وش قصتهم .. وبعد نص ساعة تقريبا مر واحد وأشرت له ووقف .. وكان رايح باتجاة الرياض .. سألني وين تبي؟ قلت الرياض قال لي اسمح لي انا رايح لقرية " صحن " 120 كيلو قدام .. قلت خلاص اروح معك ولا اقعد بالشمس .. وفعلا ركبت مع ذا الشايب الين وصلنا للقرية .. قال لي خلاص انا بلف من هنا .. انت خلك على الخط وأركب مع أي واحد رايح للرياض .. والله وانزل وانا وجهي مغبر وحالتي حالة ويا شنطتي اللي كانها شنطة سواق توه جاي من اندونيسيا .. واقعد شوي وماش مافيه سيارات والساعة تقريبا 4 العصر وتذكرت إني ماصليت الظهر واتيمم واصلي الظهر والعصر جمع تأخير .. وسبحان الله وانا اصلي وقفت سيارة ونزلوا منها اثنين وصلوا معي وبعد الصلاة سألوني وين رايح قلت الرياض قالوا يالله معنا احنا رايحين الرياض .. ويفرجها ربي واطلع معهم ومانزلوني الا عندي بيتي .. الله يجزاهم خير وادخل وانا وجهي مغبر كاني طالع من قبر .. واشوى محد انتبه لي واغسل وجهي واغير ملابسي واطلع فوق .. وبصراحة محد متوقع إني برجع وسألتني أمي وش فيك رجعت قلت ابد والله ماجاز لي الباص ووقفت بالطريق ورجعت .. قالت لي اشوى انك مارحت .. ؟!!؟

مرت الليلة الأولى وانا مقهور ودي اروح للمكتب واحرق فيه .. بس قلت ماني فاضي له الحين ابي اسافر .. (( كل هذا وماتبت )) وقلت ياولد مافيه الا اروح بطيارة لو يقولون التذكره بخمس الاف ولا اتمرمط في باص 35 ساعة واقف ..!! المهم تذكرت ان واحد من خوياي عنده مكتب سياحي قلت بس هو اللي بيحجز لي كل شي .. وادق عليه وقال مرني بالمكتب ويصير خير .. وفعلا بنفس الليلة رحت له وضبط أموري وقصيت التذكره بـ 2700 ريال والرحلة بتكون عن طريق جدة .. ورجعت البيت وانا مبسوط لأني بوصل قبل حقين الباص خخخخخ وكانت الرحلة في نفس الليلة الساعة 2 الفجر .. وارجع للبيت واجهز اغراضي واودع اهلي وصاروخ على المطار .. وزين لحقت على الرحلة .. ؟

اقلعت الطائرة ونزلنا في جدة والحين عندي رحلة ثانية على الخطوط اليمنية .. تقلع الساعه 5 ونص الفجر .. وصاروخ على الرحلات الأجنبية واخلص التأشيرة واقعد بصالة الانتظار .. باقي تقريبا ساعة على الأقلاع .. وامسك كتاب واقعد اقرأ فيه وانسجمت معه وماسمعت الإعلان .. اثاريهم اعلنوا عن الطيارة وانا مادريت .. اذن صلاة الفجر ورحت اتوضى .. ومن العجلة نسيت جوالي في دورات المياة وانتم بكرامة .. واصلي يوم خلصت لقيت واحد من موظفين المطار وسألته عن الرحلة قال لي إلحق عليها .. البوابة رقم كذا .. واضف الشنطة واركض الين وصلت البوابه .. ودخلت الباص اللي يوصل الركاب للطيارة .. واول ماجلست في الباص وقبل يتحرك فقدت جوالي .. واتذكر إني حطيته على الرف وانا اتوضى .. واطمر قبل يقفلون الباب واروح والقطة وارجع ركض .. ويوم جيت الا الباص قد حرك .. ويجي باص ثاني واركب فيه أحسبه رايح لنفس الطيارة .. ويلقطنا ذا الباص ويودينا لطيارة هندية .. طبعا انا مانتبهت وماقريت وش مكتوب على الطيارة ركبت زي الثور وما سألت أحد .. يوم دخلت الطيارة استغربت كلهم هنود .. وأسأل المضيف هذي الرحلة وين رايحه .. قال لي انت وين تبي قلت عدن على الخطوط اليمنية .. قال ويييين !! روح الحق على الطائرة هذيك هي .. ويأشر عليهاا .. وش جابك هنا هذي رايحة للهند .. وليــّـــه .. بغيت اروح بومباي !! وانزل زي الحمامة وعلى الطيارة الثانية وقبل أركب تأكدت انها هي .. ايه لازم الواحد يتعلم من اخطاءة أجل تطلع طائرة افريقية واروح كينيــا .. ( خخخخخخخ ) ..!!

ركبت الطيارة على طلعة الفجر في جـو ونيــس خصوصا ان كل الركاب يمنـة وحضــارم حقين جدة .. والكابتن ابو يمن .. يالله رقعهــا !! المهم اقلعت الطائرة .. وبعد شوي وزعوا لنا فطور .. تخيلوا وش فطورهم .. كروسان ؟؟ لاا طبعااا ؟؟ فطاير ؟؟ لااا ؟؟ الفطور سلمكم الله عصير تفاح الربيع وكيك امريكانا ( خخخخخخ ) بس برضة احسن من الباص .. والله ونفطــر كيك ونسـف العصيـر وننااام !! بعد ساعتين اعلن الكابتن ابو يمن .. انا على وشك الهبوط في مطار عدن الدولي ( أي دولي والله ان استراحتنا أكبر منه ) وعلى الركاب ربط الأحزمة ومادري وشو ..

المهم نزلت الطيارة وبدينا نقرب من المدرج بس للحين الطيارة مايلة على جنب والكابتن نازل بقوة على الأرض .. وش لون بتنزل بس .. شكله مخزن قات لين استوت عنده وماعاد يعرف يوازي الطيارة .. المهم كلنا على اعصابنا ونقول كيف بتنزل بهالطريقة .. وشوي الا الطيارة يوم ضربت بقوة على الأرض وكلن شهق مع الضربة وتفككت الأدراج وطاحت بعض الشنط على الركاب .. واللي يبكي واللي يصيح وصياح البزران من كل جهه وانا قاعد اتشهد من الخــوف .. وحسيت بألم فضيع في عيني وحسيت انها بتطلع .. ؟؟

المهم نزلت وانا ماسك شنطتي وماسك عيني (خخخخخ) وادخل المطار واصف عند الجوازات .. واعطيهم جوازي !! طبعا في اليمن فيه طقوس لازم تتبعها . يعني عيب عليك تمد الجواز فاضي لازم تدفع كمسيون واللي يسمونه " حق القات " .. وموظف الجوازات زعل يوم شاف الجواز فاضي واستقعد لي .. قال فلان : قلت نعم .. قال لي هذا مو انت اللي في الجواز .. قلت أدري هذا نسيبي .. قعد يضحك .. قلت لاتضحك !! وش هالسؤال .. هذا انا بس الجواز قديم شف تاريخ الاصدار قبل اربع سنوات واذا قصدك السكسوكة احلقها الحين ويطلع نفس الوجه .. انا عارف ليه عرقلني علشان الجواز فاضي والا لو شاف الجواز فيه فلوس كان مشاني لو الصورة صورة حرمه .. بس قلت أحدّه على اقصاه واشوف وش ناوي يسوي اذا مادفعت له عموله .. ؟؟

المهم قال لي الجواز هذا مانقبله والصورة فيها اختلاف كثير .. قلت يالحبيب هالكلام ماقالوه ربعك اللي في جدة واعطوني تأشيره بدون أي مشاكل وش معنى انت .. قال لي تفضل معي في المكتب وتفاهم مع المدير .. دخلت على المدير وشرحت له الوضع قال لي بسيطة ادفع له أي شي وبيمشيك .. قلت له مستحيل .. قال مو من صالحك .. قلت وش بيسوي يعني .. قال بيحولك للتحقيق وبتكبر المشكلة أكثر .. وبتدخل في قضايا تزوير مالها أول ولا آخر .. ؟؟


البقية في الجزء الثالث